So pakaasal a kiya Iranona ko saba-ad ko mga Maana o Qor-an a Susulaan na miyapasad a galubuk o mindod sa Limoo Allah (Allaho Yarhamoh) a si Sheikh Abdulaziz Guro Alim Saromantang. Sukaniyan so miyaona a Mayor sii sa ingud a Tugaya Lanao del Sur, sii sa Pilimpinas. So kiya Iranon na sangkai a Qor-an na miyokit ko tanto a madakul a kiya pumomosawira iron, kiya pagimpidimpid iron nago kiya zalusawawn matiya o mga Ulama sii sa "Lajnatul Moraja-ah", so "Islamic Endowment Foundation of the Philippines" ago giya "Riasat Al-Buhuth Al-Ilmiyah wal Ifta wad Da'wah wal Irshad".

So puman so kinisoratunon sa electroniks na miyokit sa kiyathompokan a galbk i Director Ashary Tamano ago si pagari niyan asi Engineer Abdulbasit Tamano, a maka gaganat sa Ingud a Tugaya, Lanao del sur, Philippines. Giyang kai a manga batang a electronics (electronics texts) na minitondog nago piyaka ayonai ko kiya tombokawn a Qor-an Complex Publication.

Giyangkoto a miya aloy a kinisoratunon sa electroniks na pimbiabiatan oto sa kiya baloyawn a special file a miyaparo a kiya tago iyan ko pimbarabasa a program sa kompyotir a bithowan sa Qur-an Viewer a pimba-alan i Jamal Al-Nasir, sukaniyan so mithaong sii ko mga ala a galubuk a Divine Islam.

So Qor-an a Susulaan

Sii ko pakaasal o basa niyan a so Arabic na giyangkai a Qor-an na mga katharo a phoon ko Allah san ko mga manosiya a miyakang golalan ko Sogo iyan a so Mohammad (so kalilintad nago kada a rayorayo a ginawa na sii rukaniyan). Dapiya antonaa a basa a kapunudiyorobasai ko Qor-an na diniyandun mapropa so kada a paawing. Inonta, na giyangkai a galubuk na Insha Allah na mala a kaphaka ogop iyan ko gopun a phamaganad a khababayaan iran a ka sowaa iran ko mipantag ko Islam nago so Qor-an a Susulaan. Giyoto i sabap a kipphando onon sa kapaka kokowa o oman i phitanggisaan sangkai a Qor-an ko kinitomboknon sa Karatas na goso kini salinun non mambo sa kompyotir ko kabaloyawn a pukhandodan nago so mga pud a khiogopian makapunggolalan ko kompiyoter datar o mga kambabanog sa mga sataga a katharo nago so mga salakaw ro-o.

So mga pandoan a madadalum ko Qor-an a Susulaan na ini ilaham sii ko Sogo Iyan sa miya zaginton sii ko mararani miyaka dowa polo ago tulo (23) ragon. So Sogo Iyan na sii sukaniyan ko ika pat polo ragon (40) a idad iyan gowani ko giyangkai a Qor-an na pho-onan a kiphagilaham non sii Rukaniyan, a minipantag ko ika Num Gatos ago Sapolo Ragon {610 AD) ko Kinimbawataan ko Nabiyullah Isa (Alayhis Salaam). Go suka niyan (a Nabi Mohammad) na Num Polo ago Tulo (63) Ragon a idad iyan isako masamporna a ki phagilaham non ko Qor-an nago taros a mindod sukaniyan sa Limo o Kaduna Niyan (So kapakasulang sa maliwanag nago kada-a Rayorayo a ginawa na san rukaniyan a Nabi).